• swimates

女游俄羅斯

喺呢段無得旅行又等緊泳池重開嘅日子,大家少不免重溫旅行片段,如果你鍾意游水、又或者每次旅行會揀去陽光與海灘嘅地方,無論點都望吓海落吓水先安樂的話,就要留意不定期推出嘅女游旅遊系列。篇幅有限,今次先由畢團長同大家簡單咁分享喺俄羅斯貝加爾冰湖(Lake Baikal)嘅體驗啦!
畢團長嘅行程原本是沿線玩西伯利亞鐵路,於是揀呢個最切合女游團主題嘅其中一站沿線城市伊爾庫茨克(Irkutsk)轉車坐五小時車,由天光坐到天黑再轉破冰船先到達呢個約一千人居住的小鎮 — 座落世界文化自然遺產貝加爾湖南面的奧利洪島(Olkhon island)。
喺奧利洪島總共逗留三日兩夜,兩日分別參加南北線本地遊,可透過民宿或渡假村報名,行程沿岸邊經森林去奧利洪島的懸崖和整個貝加爾湖景、島內幾個冰湖、行小山岳去奧利洪島最北邊的合波角,每天行程約六小時。司機導遊識少少英文,每日晏晝仲會預備俄式午餐魚湯、麵包同熱茶比大家暖身,分別係山頭露天嘅涼亭同度湖上面開餐都係第一次🍲十二月尾嘅奧利洪島氣溫大概負十幾度,但係對當地人嚟講都未算好凍,貝加爾湖面只係呈半結冰狀態,所以如果想體驗成架車由內陸碼頭經冰湖直駛向奧利洪島嘅話,二月就最適合啦!

環島遊因為路程崎嶇,小型車沿路都好似玩過山車咁拋來拋去,假如易暈車浪嘅就要注意是否選擇本地遊行程,團長游開水食慣浪就唔怕啦。除咗本地遊,某些民宿都會提供雪橇車同俄羅斯桑拿,有啲大型旅店有機會要收費,今次團長住的家庭式民宿就免費享嘅俄羅斯桑拿啦!記得俄羅斯冬天日照時間特別短,完成一天本地遊後基本上已入黑,想乜都玩曬就要預留四或五日時間唔洗咁急,呢次奧利洪島之旅,無論係勁痴線嘅長車程、破冰船、環島遊、俄式家庭餐等等,最重要係無受光污染,夜晚睇星好清楚!假如有興趣團長住過嘅木屋家庭民宿資料,可以 inbox 我們查詢啦!片段可到 Instagram 動態精選重溫。


補充資料:

● 團長這次沿線玩西伯利亞鐵路,從香港乘搭往海參崴坐西伯利亞火車於莫斯科回程,來回機票連稅 約 2,878 港元。(以 2017 年價錢作準)香港亦有直航至伊爾庫茨克來回機票連稅約 4,200 港元(以 2020 年價錢作準),現因疫情關係暫停。
● 俄羅斯有 14 天免簽證。
● 當地消費以盧布結算,1 港元現約兌 9.75 盧布。
0 次查看0 則留言